नेपाल चिकित्सक संघले डा. गोविन्द केसीको जीवन रक्षाका लागि पहल गर्न सरकारसँग आग्रह गरेको छ।

शनिबार संघका अध्यक्ष डा. बन्द्रि रिजाल र महासचिव डा. विश्वराज दवाडीले प्रेस विज्ञप्ति जारी गरी सरकारसँग आग्रह गरेका छन्। डा. केसीले सत्याग्रहमा बस्नुपर्ने अवस्था आएकोप्रति संघको गम्भीर ध्यानाकर्षण भएको जनाइएको छ।

संघले सत्याग्रहका क्रममा डा. केसीको स्वास्थ्य समस्या देखिएकोमा चिन्ता जनाएको छ। यससँगै डा. केसीको हालसालै शल्यक्रिया गरिएको पनि स्मरण गराएको छ।

त्यसैले तत्काल उनका माग सम्बोधनका लागि पहल गर्न सरकारलाई आग्रह गरेको छ।

संघले भनेको छ, ‘उहाँको स्वास्थ्यमा विभिन्न समस्याहरू उत्पन्न भइरहेकोले उहाँको उमेर, हालसालै सम्पन्न गरिएको शल्यक्रियाबाट स्वास्थ्य लाभमा रहनुभएको स्थितिलगायतलाई मध्यनजर गरी उहाँको जीवन रक्षाका लागि उहाँले उठाउनुभएको जायज मागहरूलाई हदैसम्मको संवेदनशिलताका साथ उपयुक्त समाधानका लागि आवश्यक पहल गर्न नेपाल चिकित्सक संघ नेपाल सरकारलगायत सम्पूर्ण सरोकारवालाहरूलाई हार्दिक आग्रह गर्दछ।’

पाँच बुँदे माग राखेर डा. केसी धनगढीमा २४औं सत्याग्रहमा छन्। उनको स्वास्थ्यमा समस्या आएपछि धनगढीस्थित प्रादेशिक अस्पतालको आईसीयूमा सारिएको छ।