काठमाडौं । काठमाडौं महानगरपालिकाका मेयर बालेन्द्र (बालेन) शाहले सुनसरीमा भएको घटनाप्रति गहिरो दुःख व्यक्त गर्दै मृतकप्रति श्रद्धाञ्जली र घाइतेहरूको शीघ्र स्वास्थ्यलाभको कामना गरेका छन्।
सामाजिक सञ्जालमार्फत सार्वजनिक गरेको सम्बोधनमा उनले सामान्य घटनाबाट उत्पन्न आक्रोशले ज्यान जाने अवस्था सिर्जना हुनु दुःखद भएको उल्लेख गरेका छन्। समाजमा डर, अविश्वास र अशान्ति फैलिएको भन्दै यस्तो अवस्था मानवताविरुद्ध भएको उनको भनाइ छ।
शाहले आफू मेयरका रूपमा मात्र नभई एक नेपाली नागरिकका रूपमा पनि घटनाबाट मर्माहत भएको उल्लेख गर्दै पीडित परिवारप्रति समवेदना व्यक्त गरेका छन्। उनले पीडितले यथाशीघ्र न्याय र क्षतिपूर्ति पाउनुपर्ने तथा दोषीमाथि कानुनबमोजिम कारबाही हुनुपर्नेमा जोड दिएका छन्।
उनले घटनाबाट सरकारले गम्भीर पाठ सिक्नुपर्ने र भविष्यमा यस्ता घटना दोहोरिन नदिन आवश्यक निर्णय तथा सुधारका कदम तत्काल चाल्नुपर्ने बताएका छन्। सुरक्षाकर्मीको गोलीबाट नागरिकले ज्यान गुमाउनु र घाइते हुनु सामान्य विषय नभएको उल्लेख गर्दै उनले निष्पक्ष अनुसन्धान गरी सत्य बाहिर ल्याउन आग्रह गरेका छन्।
शाहले सरकारले सम्पूर्ण घटनाको गम्भीर समीक्षा गरी जिम्मेवार ढंगले अघि बढ्नुपर्ने आवश्यकता औंल्याउँदै पीडित परिवारलाई न्यायको अनुभूति दिलाउन सबै संयन्त्र परिचालन गर्नुपर्ने धारणा राखेका छन्।
उनले नागरिकलाई उत्तेजना, आक्रोश र प्रतिशोधको भावनामा नबहकिन आग्रह गर्दै कुनै पनि हिंसात्मक गतिविधिमा संलग्न नहुन अपिल गरेका छन्। सुरक्षित, संयमित र जिम्मेवार भएर सामाजिक सद्भाव, प्रेम र आपसी सम्मान कायम राख्न उनले सबैलाई आह्वान गरेका छन्।
सम्बन्धित खवर
तपाईंको प्रतिक्रिया दिनुहोस्
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।