काठमाडौँ । मर्दी पदयात्रामा गएर सम्पर्कविहीन भएका पोखराका तीन पदयात्रीहरूसम्म प्रहरीको उद्धार टोली पुगेको छ ।

उनीहरु छोमरोङको पिँधस्थित मोदी खोलाको पारीपट्टि सकुशल भेटिएका हुन् । पर्यटन मन्त्री खड्कराज पौडेलले सामाजिक सञ्जालमा लेख्दै उनीहरुले हिजो र अस्ति ओढारमा रात बिताएको बताएका छन् ।

आज बिहान ९ः२३ बजेको समयमा प्रहरी जवान सुमन नेपाली बिजुलीको लाइन काटी खोलावारी र खोलापारी रहेको बिजुलीको पोलमा रहेको तार हुँदै उनीहरु भएको ठाउँमा पुगेको प्रहरीले जनाएको छ ।

कास्कीको माछापुच्छ्रे–९ बादलडाँडास्थित मर्दी हिमाल ट्रेकिङमा गएका पोखरा–१४ खसीबजारका २४ वर्षीय अजित जिसी, २३ वर्षीय युकेश गुरुङ र २३ वर्षीय दिपेश गुरुङ फसेका हुन् । उनीहरु ट्रेकिङ क्रममा जङ्गलमा अलपत्र परेका थिए । उनीहरु साउन २० गते राति ८ बजे सम्पर्कमा आएका थिए । उनीहरुको खोजी शुरु भएको थियो ।

मोदी खोलामा पानीको अत्यधिक बहाव रहेका कारण हिजो उद्धार गर्न सम्भव नभएको हो । उद्धारका लागि डोजरको प्रयोग गरी रुख ढालेर अस्थायी पुल निर्माणको प्रयाससमेत असफल भएको थियो ।