काठमाडौं — नेपाल प्रहरीमा अनिवार्य अवकाश पाउनेभन्दा सेवा अवधि पूरा नहुँदै राजीनामा दिने प्रहरी कर्मचारीको संख्या झन्डै दोब्बर पुगेको छ। आर्थिक वर्ष २०८२/८३ मा ६ सय ८१ जना प्रहरी कर्मचारी अनिवार्य अवकाशमा गएकोमा १ हजार २ सय ६४ जनाले राजीनामा दिएको तथ्यांक सार्वजनिक भएको छ।यसरी हेर्दा अनिवार्य अवकाशको तुलनामा राजीनामा दिने प्रहरी कर्मचारीको संख्या करिब १ दशमलव ८६ गुणा बढी देखिन्छ। सेवा अवधि पूरा गर्नुअघि नै ठूलो संख्यामा जनशक्ति बाहिरिन थालेपछि नेपाल प्रहरीलाई अनुभवी जनशक्ति अड्याउन चुनौती थपिएको छ।प्रहरी कर्मचारीले बीचमै सेवा छाड्नुका पछाडि सेवा–सुविधा, कार्यबोझ, पेन्सनका लागि आवश्यक सेवा अवधि तथा वैदेशिक रोजगारीका अवसरलगायत कारण रहेको प्रहरी अधिकारीहरूले बताउँदै आएका छन्। विगतमा गरिएको अध्ययनले पनि तल्लो तहका प्रहरी कर्मचारीमा कम सेवा–सुविधा र लामो पेन्सन अवधिका कारण जागिर छाड्ने प्रवृत्ति देखिएको उल्लेख गरेको थियो।

प्रहरीमा तालिम तथा अनुभव हासिल गरेका कर्मचारी बीचमै बाहिरिँदा संगठनले नयाँ जनशक्ति भर्ना र तालिममा पुनः लगानी गर्नुपर्ने हुन्छ। यसले एकातर्फ राज्यको खर्च बढाउने र अर्कोतर्फ अनुभवी जनशक्ति अभावको समस्या निम्त्याउने देखिन्छ।प्रहरीभित्र बढ्दो राजीनामा रोक्न सेवा–सुविधा पुनरावलोकन, वृत्ति विकासको अवसर विस्तार तथा पेन्सनसम्बन्धी व्यवस्थामा सुधार आवश्यक रहेको प्रहरी क्षेत्रका जानकारहरूको भनाइ छ।