काठमाडौं । राष्ट्रिय स्वतन्त्र पार्टी (रास्वपा) ले आफ्ना मन्त्रीहरू र आम नागरिकबीच प्रत्यक्ष संवाद गराउन नयाँ कार्यक्रमको घोषणा गरेको छ। रास्वपाले आगामी भदौ महिनादेखि ‘नागरिक, नीति र नेतृत्व’ नामक कार्यक्रम सुरु गर्न लागेको हो।रास्वपा सहमहामन्त्री असिम शाहद्वारा जारी विज्ञप्ति अनुसार, यो कार्यक्रम अन्तर्गत सरकारमा रहेका रास्वपाका मन्त्रीहरू महिनामा कम्तीमा एक पटक अनिवार्य रूपमा केन्द्रीय पार्टी कार्यालयमा उपस्थित हुनुपर्नेछ ।
भुइँमान्छेका आवाजलाई राज्यको नीति निर्माण र कार्यान्वयनको तहसम्म पुर्याउन यो कार्यक्रमले पुलको काम गर्ने विज्ञप्तिमा उल्लेख छ ।यो कार्यक्रमलाई दुई चरणमा विभाजन गरिएको छ । जसमा साँझ ५:०० देखि ६:०० बजेसम्म नागरिक संवादअन्तर्गत नागरिकका लागि खुला रहनेछ । यस अवधिमा मन्त्रीले सीधै सर्वसाधारणका गुनासा, समस्या, अपेक्षा र सुझाव सुन्ने छन् ।
साँझ ६:०० बजेपछिको नेतृत्व संवादमा मन्त्री, पार्टीका केन्द्रीय सदस्यहरू र सांसदबीच संयुक्त बैठक बस्नेछ। यस बैठकमा नागरिकबाट प्राप्त सुझाव र देशका समसामयिक एवं नीतिगत विषयमा सघन छलफल गरी पार्टीको धारणा तय गरिने बताइएको छ ।मन्त्रीहरूलाई आम नागरिकप्रति प्रत्यक्ष रूपमा जवाफदेही बनाउने र नागरिकका वास्तविक समस्या बुझेर यथार्थपरक राष्ट्रिय नीति एवं कानुन निर्माणमा जोड दिने लक्ष्य राखेको रास्वपाको भनाइ छ ।साथै, नागरिक, सरकार, व्यवस्थापिका र पार्टी संगठनबीचको समन्वयलाई थप चुस्त र प्रभावकारी बनाउनु अर्को मूल उद्देश्य राखिएको छ ।
सम्बन्धित खवर
तपाईंको प्रतिक्रिया दिनुहोस्
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।