बुटवल । जनता समाजवादी पार्टी (जसपा) नेपाल नवलपरासीले लुम्बिनी प्रदेशका चार जना सांसदको पक्षमा उभिँदै उनीहरूमाथि गरिएको कारबाही तत्काल फिर्ता लिन माग गरेको छ ।
जसपा नेपाल नवलपरासीका जिल्ला अध्यक्ष मुकुरजी गिरीको अध्यक्षतामा बसेको बैठकले चार सांसदलाई गरिएको कारबाहीले लुम्बिनी प्रदेशमा पार्टी संगठन कमजोर हुने निष्कर्ष निकाल्दै उनीहरूको पार्टी पद तत्काल बहाल गर्न माग गरेको हो ।बैठकले चार सांसदलाई गरिएको कारबाही लुम्बिनी प्रदेशमा पार्टी संगठनका लागि ‘कुठाराघात’ भएको ठहर गर्दै पार्टीका केन्द्रीय संरक्षक महन्थ ठाकुरसमक्ष कारबाही फिर्ताका लागि अनुरोध गर्ने सर्वसम्मत निर्णय गरेको जनाएको छ । अध्यक्ष गिरी तत्कालीन लोकतान्त्रिक समाजवादी पार्टी (लोसपा)बाट प्रतिनिधित्व गरेका नेता हुन् ।
बैठकमा नवलपरासी पश्चिमबाट तत्कालीन लोकतान्त्रिक समाजवादी पार्टी नेपालबाट समायोजन भएका नेताहरूलाई जसपा नेपालको केन्द्रीय कार्यसमितिमा थप समावेश गर्नुपर्ने विषयमा समेत छलफल भएको थियो ।जिल्लाबाट एक जना सहमहामन्त्री, एक जना केन्द्रीय कार्यकारिणी समिति सदस्य र तीन जना केन्द्रीय सदस्य गरी कम्तीमा पाँच जनालाई केन्द्रीय कार्यसमितिमा समायोजन गर्न माग गर्ने निर्णय बैठकले गरेको छ ।
सम्बन्धित खवर
तपाईंको प्रतिक्रिया दिनुहोस्
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।