काठमाडौं । नेकपा एमालेको जारी केन्द्रीय कमिटी बैठक लम्बिने भएको छ । यसअघि बुधबार बैठक समापन गर्ने तयारी भएपनि कार्यसूचीमाथि नै नेताहरूले आपत्ति जनाएपछि केन्द्रीय समिति बैठककै बिच बुधबार बिहान सचिवालय बैठक पनि बस्ने तय भएको छ । 

अब बिहीबार मात्रै केन्द्रीय कमिटी बैठक अन्त्य गर्न नेताहरू सहमत भएको बताइएको छएमालेका एक नेताले दिएको जानकारीअनुसार बुधबार बिहान सचिवालय बैठकले अहिले जारी बैठकको कार्यसूची अनुमोदन गर्ने छ । एमालेले यसअघि नै ९ वटा कार्यसूची तय गरेको थियो । तर उक्त कार्यसूची अनुमोदन भने भएको थिएन ।  सचिवालयबाट कार्यसूची अनुमोदन राएर बुधबार   दिउँसो १ बजेदेखि फेरि केन्द्रीय कमिटी बैठक निरन्तर गरिनेछ ।

सोमबारदेखि सुरु भएको बैठकमा नेताहरूले लामो समयपछि बसेको बैठकमा बोल्न चाहनेहरूलाई समय उपलब्ध गराउनुपर्ने र अहिले तय भएको समयले नपुग्ने अध्यक्ष ओलीलाई बताएका थिए ।

महासचिव शंकर पोखरेलले यसबारे सोमबारको बैठकलगत्तै अध्यक्ष ओलीको निवास भक्तपुरको गुण्डु पुगेर जानकारी गराएका थिए ।

बैठकको पहिलो दिन अध्यक्ष ओलीले ७८ पेज लामो प्रतिवेदन पेस गरेका थिए । जसमा नेतृत्व परिवर्तन र पुनर्गठनको मुद्दा हटाइएको छ ।

एमालेमा गत निर्वाचनपछि पुनर्गठनको बहस चुलिँदै आएको थियो । तर, अध्यक्ष ओलीको अनिच्छाका कारण विशेष महाधिवेशन र नेतृत्व पुनर्गठनको मुद्दा ओझेलमा परेको छ ।