जापानको इची–नागोयामा जारी २०औँ एसियाली खेलकुदअन्तर्गत पुरुष क्रिकेटमा नेपालको समूह ‘ए’को खेलमा अफगानिस्तानले आयोजक जापानलाई ४८ रनले पराजित गरेको छ।कोरोगी स्पोर्ट्स पार्कमा बिहीबार भएको खेलमा अफगानिस्तानले दिएको १३० रनको लक्ष्य पछ्याएको जापान १९.३ ओभरमा ८१ रनमै अलआउट भयो।
टस जितेर जापानले पहिले बलिङ रोजेपछि ब्याटिङ गरेको अफगानिस्तानले निर्धारित २० ओभरमा ६ विकेट गुमाएर १२९ रन बनाएको थियो। अफगानिस्तानका मोहम्मद अक्रमले सर्वाधिक ३४ रन बनाए। कप्तान दारविस रसुलीले २९ तथा मोहम्मद इशाकले अविजित २५ रन जोडे।
जापानका लागि रेओ सकुरानो–थोमसले २३ रन बनाउँदा बेन्जामिन इटो–डेभिसले ८ बलमा १७ रन बनाए। तर अन्य ब्याटरले ठूलो साझेदारी गर्न नसक्दा जापान लक्ष्यसम्म पुग्न सकेन।
अफगानिस्तानका अरब गुल मोमन्दले उत्कृष्ट बलिङ गर्दै ४ विकेट लिए। नाङ्गेयालिया खारोटेले ३ विकेट लिए भने अब्दुल्लाह अहमदजाईले २ विकेट लिए।यस जितसँगै अफगानिस्तानले समूह ‘ए’मा महत्वपूर्ण दुई अंक जोडेको छ। नेपाल यही समूहमा अफगानिस्तान र जापानसँगै रहेको छ। अब अफगानिस्तानले शुक्रबार नेपालसँग प्रतिस्पर्धा गर्नेछ भने
नेपालले त्यसपछि शनिबार जापानसँग खेल्नेछ। समूहका शीर्ष दुई टोली क्वार्टरफाइनलमा प्रवेश गर्नेछन्। नेपालको पहिलो खेल अफगानिस्तानसँग शुक्रबार हुनेछ। अफगानिस्तानले जापानलाई हराएपछि नेपालविरुद्धको खेल दुवै टोलीका लागि समूहको शीर्ष स्थानका दृष्टिले महत्वपूर्ण बनेको छ।
सम्बन्धित खवर
तपाईंको प्रतिक्रिया दिनुहोस्
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।