काठमाडौँ । चलचित्र विकास बोर्डको रिक्त अध्यक्ष पदका लागि १२ जनाको आवेदन परेको छ ।सञ्चार तथा सूचना प्रविधि मन्त्रालयले केही दिन अघि बोड अध्यक्षका लागि आवेदन मागेको थियो । मन्त्रालयले तोकेको असोज ७ गते बुधबारसम्मको अन्तिम म्यादभित्र निर्देशक, कलाकार, अभिनेत्रीदेखि चलचित्र पत्रकारसम्मले अध्यक्ष पदका लागि दाबी पेस गरेका हुन् ।
आवेदन परेका १२ जनाको नाम अहिले गोप्य राखिएको छ । मन्त्रालय स्रोतका अनुसार बोर्ड अध्यक्षका लागि आवेदन दिनेमा जया ओझा, भीमा मैनाली, नरेश पौडेल, नरेशकुमार केसी, निशा अधिकारी, मनिष पण्डित लगायत रहेका छन् । आवदेन दिने सबै योग्यता र मापदण्ड पुगे नपुगेको छानबिन प्रक्रियापछि मात्र सार्वजनिक गरिने मन्त्रालयले जनाएको छ । केही आवेदकको फर्म मात्र आएको र अन्य डकुमेन्ट नबुझाएकाले सर्टलिष्टमा केही छाटिन सक्ने मन्त्रालयले बताएको छ ।
अध्यक्ष छनोट प्रक्रियालाई अघि बढाउन मन्त्रालयले मन्त्रीस्तरीय निर्णयमार्फत तीन सदस्यीय छनोट तथा सिफारिस समिति गठन गरेको छ । मन्त्रालयका सचिव राजेन्द्रकुमार पौडेलको संयोजकत्वमा गठित समितिमा बोर्डका कार्यवाहक अध्यक्ष रविलाल शर्मा र वरिष्ठ चलचित्रकर्मी अशोक शर्मा सदस्य रहेका छन् ।
दरखास्त दिएका १२ जनाको आवेदन अध्ययन तथा छनोट प्रक्रिया अघि बढाउन आज समितिको बैठक मन्त्रालयमा बस्दैछ । विगतका अभ्यास र नयाँ आवश्यकतालाई समेटेर अध्यक्ष छनौटका लागि कार्यविधि तथा मापदण्ड बनाइएकोछ । सुरुवाती चरणमा केही व्यक्तिलाई मात्र ‘सर्टलिस्ट’ गरेर ५ जनालाई अन्तर्वार्तामा बोलाउने अनौपचारिक छलफल भएपनि सबै आवेदकलाई प्रस्तुतीकरण र अन्तर्वार्तामा सामेल गराउनुपर्ने पक्षमा आफू रहेको समितिका सदस्य अशोक शर्माले बताए ।
‘सुरुमा ५ जनालाई मात्र सर्टलिस्ट गर्ने कुरा पनि चलेको थियो । तर, चलचित्रकर्मीहरू अलि बढी संवेदनशील हुने भएकाले कसैलाई नबुझीकनै पन्छाइदियो भन्ने नपरोस् भनेर मैले सबैलाई अवसर दिनुपर्छ भन्ने सोच बनाएको छु’, समितिका सदस्य शर्माले भने ‘आजको बैठकमा म सबै आवेदकलाई प्रस्तुतीकरण र अन्तर्वार्तामा बोलाउने प्रस्ताव राख्नेछु ।’
शर्माका अनुसार आवेदकहरूले आफ्नो कार्ययोजनाको प्रस्तुतीकरण (प्रेजेन्टेसन) दिनुपर्नेछ र त्यसपछि समितिले उनीहरूको अन्तर्वार्ता लिनेछ । आवेदन परेकाहरूको योग्यता, कार्ययोजना प्रस्तुतीकरण तथा अन्तर्वार्ताको मूल्याङ्कन पश्चात् समितिले उपयुक्त व्यक्तिको नाम बोर्ड अध्यक्षका लागि मन्त्रालयमार्फत मन्त्रिपरिषद्मा सिफारिस गर्नेछ ।
सम्बन्धित खवर
तपाईंको प्रतिक्रिया दिनुहोस्
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।