बझाङ। चीनको तिब्बतस्थित पुलान काउन्टीको ताक्लाकोटमा नेपाल–चीन सीमावर्ती अधिकारीबीच बैठक सम्पन्न भएको छ। बैठकमा सीमा सुरक्षा, विपद् व्यवस्थापन, सूचना आदानप्रदान तथा परम्परागत व्यापारिक र सांस्कृतिक सम्बन्धलाई निरन्तरता दिने विषयमा छलफल भएको हो।

बैठकमा सीमावर्ती नेपाली नागरिकले तिब्बत प्रवेश गर्दा भोग्दै आएको आवतजावतको समस्या समाधान गर्न र उपयुक्त नाकाबाट प्रवेश तथा फर्किन पाउने व्यवस्था गर्न नेपाली पक्षले माग गरेको छ। यस्तै, कैलाश–मानसरोवर यात्रालाई सहज बनाउने तथा धार्मिक प्रयोजनका लागि मानसरोवरको जल ल्याउन विशेष अनुमति दिनुपर्ने विषय पनि उठाइएको छ।

नेपाल र तिब्बत क्षेत्रमा रहेका हिमतालको अवस्था अध्ययन गर्ने तथा हिमताल विस्फोट, बाढीपहिरो र अन्य विपद् तथा सीमा सुरक्षासम्बन्धी सूचना नियमित रूपमा आदानप्रदान गर्ने सहमति भएको छ। यसका लागि दुवै पक्षबीच सूचना आदानप्रदान गर्न ‘विच्याट ग्रुप’ समेत बनाइएको सहभागीहरूले बताएका छन्।

बैठककै अवसरमा हुम्लाको नाम्खा गाउँपालिका र पुलान काउन्टीबीच भगिनी सम्बन्ध स्थापना गरिएको छ। बझाङको साइपाल गाउँपालिका र पुलान काउन्टीबीच पनि आगामी वर्ष भगिनी सम्बन्ध स्थापना गर्ने प्रक्रिया अघि बढाउने सहमति भएको छ।

नेपाली पक्षले बझाङको उरै नाका सञ्चालनमा ल्याउन सके कैलाश–मानसरोवर जाने पर्यटकका लागि थप मार्ग खुल्ने र सीमावर्ती क्षेत्रमा पर्यटन तथा आर्थिक गतिविधि विस्तारमा सहयोग पुग्ने विषय पनि बैठकमा राखेको थियो।