बाँकेको राप्ती सोनारी गाउँपालिकाले भारी वर्षाका कारण हुनसक्ने बाढी तथा डुबानको जोखिमलाई मध्यनजर गर्दै सुरक्षित आश्रयस्थल तयारी अवस्थामा राखेको छ।

गाउँपालिकाका अध्यक्ष तप्तबहादुर पौडेलका अनुसार हाल पाँच वटा सुरक्षित आश्रयस्थल सञ्चालनमा छन्। ती आश्रयस्थलमा करिब दुई हजार जनालाई राख्न सकिने क्षमता रहेको छ। थप दुई वटा भवन निर्माणाधीन छन्।वर्षायाममा राप्ती नदी तथा विभिन्न खहरे खोलामा आउने बाढीका कारण बस्ती डुबान, खेतीयोग्य जमिन कटान तथा विद्यालय, स्वास्थ्य संस्था र सडकजस्ता संरचनामा क्षति पुग्ने जोखिम रहेको गाउँपालिकाले जनाएको छ।

गाउँपालिकाले विपद् प्रतिकार्य योजना तयार गरी उद्धार, सुरक्षित आश्रय, स्वास्थ्य उपचार, खाद्यान्न तथा राहत वितरण र मनोसामाजिक परामर्शका लागि तयारी गरेको छ। स्थानीय आपतकालीन कार्य सञ्चालन केन्द्रलाई २४ घण्टा तयारी अवस्थामा राखिएको छ।