काठमाडौं । नेपालका लागि जापानी राजदूत माइदा तोरुले प्रधानमन्त्री वालेन्द्र शाहसँग शिष्टाचार भेटवार्ता गर्नुभएको छ। सिंहदरबारस्थित प्रधानमन्त्री तथा मन्त्रिपरिषद्को कार्यालयमा बुधबार भएको भेटवार्तामा नेपालमा देखिएको विपद्को अवस्था र त्यसपछिको पुनर्स्थापना तथा पुनर्निर्माणका विषयमा छलफल भएको छ।
भेटका क्रममा प्रधानमन्त्री शाहले विपद्को यस कठिन परिस्थितिमा नेपाल सरकार तथा बाढी प्रभावित नागरिकप्रति जापान सरकारले देखाएको सद्भाव, सहयोग र ऐक्यबद्धताका लागि आभार व्यक्त गर्नुभयो।
यस्तै, जापानी राजदूत माइदा तोरुले विपद्का कारण ज्यान गुमाएका तथा प्रभावित परिवारप्रति दुःख व्यक्त गर्दै जापान सरकारको तर्फबाट संवेदना प्रकट गर्नुभयो। उहाँले नेपाललाई विपद्पछिको पुनर्स्थापना तथा पुनर्निर्माणका कार्यमा सहयोग गर्ने प्रतिबद्धता व्यक्त गर्नुभयो।
भेटवार्तामा विपद्बाट प्रभावित नागरिकको पुनर्स्थापना, क्षतिग्रस्त संरचनाको पुनर्निर्माण तथा आगामी दिनमा नेपाल र जापानबीच सहकार्यलाई निरन्तरता दिने विषयमा समेत छलफल भएको जनाइएको छ।
सम्बन्धित खवर
तपाईंको प्रतिक्रिया दिनुहोस्
प्रतिक्रिया प्रकाशनअघि हाम्रो सम्पादकीय टोलीले समीक्षा गर्नेछ। तपाईंको इमेल सार्वजनिक गरिने छैन।